Oktyabrın 3-də 87 yaşında vəfat edən tanınmış sovet və Rusiya psixoterapevti Anatoli Kaşpirovskinin ölümü çoxmilyonluq mirasla bağlı böyük ailə qalmaqalına səbəb olub. Əsas mübahisə mərhumun oğlu Serxio Montana ilə 54 yaşlı dul həyat yoldaşı Gülizar Çalbaşova arasında yaranıb.
Bu barədə Oxu.Az "SHOT" Telegram kanalına istinadən xəbər verir.
Hipnozçunun oğlunun sözlərinə görə, atası əvvəlcə vəsiyyətnaməni onun xeyrinə tərtib edib. Lakin dəfndən sonra Çalbaşova başqa bir sənədin mövcud olduğunu və həmin sənədə əsasən, əmlakla bağlı bütün hüquqların yalnız ona keçdiyini, Kaşpirovskinin əvvəlki iradəsinin isə ləğv edildiyini bildirib.
Serxio atasının son illərdə həyat yoldaşının güclü psixoloji təsiri altında olduğunu iddia edərək bu qərarın həqiqiliyini və könüllü olaraq verildiyini şübhə altına alır. Mənbələrin məlumatına görə, psixoterapevt hələ sağlığında Moskvadakı ikiotaqlı mənzilini gənc xanımının adına keçirib və bütün qonorarlarını ona verib.
Hüquqi mübahisənin əsas predmeti Kaliforniyada yerləşən və 340 min dollar dəyərində qiymətləndirilən yaşayış evidir. Montana iddia edir ki, ABŞ-dəki həmin daşınmaz əmlak əvvəlcə ailə şirkəti vasitəsilə müştərək alınmışdı. Serxionun boşanma prosesinə görə obyekt sonradan qaytarılmaq şərti ilə müvəqqəti olaraq Kaşpirovskinin adına rəsmiləşdirilsə də, psixoterapevt evi özündə saxlayıb və vədini yerinə yetirməyib. İndi qohumları Rusiya və xaricdəki mübahisəli aktivlərlə bağlı məhkəmə çəkişməsi gözləyir.
Xatırladaq ki, Kaşpirovski ilə vida mərasimi oktyabrın 8-də Moskvada Troyekurovskoye qəbiristanlığında baş tutub, mərasimdən sonra cənazəsini Ukraynaya aparıblar. Onun son arzusu Ukraynada dəfn edilməsi olub və ailəsi bu arzunu yerinə yetirib.
