Ukraynanın paytaxtı Kiyev şəhərində insan itkisi ilə nəticələnən ağır yol-nəqliyyat hadisəsi qeydə alınıb. Solomyansk rayonunda yüksək sürətlə hərəkət edən avtomobil əvvəlcə marşrut avtobusuna, daha sonra isə içərisində insanların olduğu dayanacağa çırpılıb.
Oxu.Az xəbər verir ki, bu barədə RBK-UKRAİNA Kiyev polisinə istinadən məlumat yayıb.
İlkin məlumatlara əsasən, "Volkswagen" markalı nəqliyyat vasitəsinin sürücüsü hərəkətdə olarkən marşrut avtobusu ilə toqquşub və ardınca sərnişinlərin gözlədiyi dayanacağa girib. Qəza nəticəsində həyatını itirənlərin və xəsarət alanların olduğu bildirilir.
Hazırda hadisə yerinə istintaq-əməliyyat qrupu, patrul polisləri və təcili tibbi yardım briqadaları cəlb edilib.
Qəzanın təfərrüatı və zərərçəkənlərin dəqiq sayı aidiyyəti qurumlar tərəfindən araşdırılır.
