Vaşinqton rəhbərliyi hesab edir ki, Ukrayna böhranının nizamlanması məqsədilə yaradılmış üçtərəfli məsləhətləşmələr formatı gələcəkdə ABŞ-nin Avropadakı müttəfiqlərinin hesabına genişləndirilə bilər.
Oxu.Az xəbər verir ki, bu barədə ABŞ liderinin kürəkəni Cared Kuşner məlumat verib.
Gələn həftə Əbu-Dabidə Rusiya, ABŞ və Ukrayna nümayəndələrinin iştirakı ilə baş tutacaq üçtərəfli məsləhətləşmələri nəzərdə tutan Kuşner "X" sosial şəbəkəsində yazıb:
"Bütün tərəflər məzmunlu və səmərəli danışıqlara hazırlıq prosesində fəal iştirak edirlər".
O əlavə edib ki, kulisdə avropalı tərəfdaşlarla sıx əlaqədə olacaqlar və irəliləyiş əldə ediləcəyi təqdirdə onların da birbaşa qatılacağı daha geniş çoxtərəfli formata keçməyə çalışacaqlar. ABŞ Prezidenti Donald Trampın kürəkəni qeyd edib ki, bu ideyalar üzərində iş davam etdirilir və onlar düşünülmüş təklifləri alqışlayırlar.
Kuşnerin fikrincə, məsləhətləşmələr zamanı "düzgün strukturun yaradılması" müharibənin dayandırılması və münaqişədən dayanıqlı sülhün mümkün olduğu şəraitə keçid üçün həlledici əhəmiyyət kəsb edəcək.
2 noyabr tarixinə olan məlumata görə, 10-11 noyabrda Əbu-Dabidə keçiriləcək üçtərəfli danışıqlarda Birləşmiş Ştatları Cared Kuşner və Amerika prezidentinin xüsusi elçisi Stiv Uitkoffun təmsil edəcəyi gözlənilir.
Rusiya Prezidentinin mətbuat katibi Dmitri Peskov bildirib ki, Əbu-Dabidəki üçtərəfli danışıqlarda Rusiya və Ukrayna üçün qarşılıqlı təhlükəsizlik təminatları müzakirə olunacaq. Rusiya nümayəndə heyətinə Rusiya Prezidentinin köməkçisi Vladimir Medinski rəhbərlik edəcək. Peskov bundan əvvəl Avropa nümayəndələrinin Əbu-Dabidə Ukrayna üzrə danışıqlarda iştirakının mümkünsüzlüyünü, çünki əvvəlcədən sadəcə üçtərəfli formatın razılaşdırıldığını açıqlamışdı.
