Fransa Prezidenti Emmanuel Makron ölkənin Silahlı Qüvvələrinə və müdafiə ehtiyaclarına ayrılan xərclərin artırılmasını nəzərdə tutan qanunu imzalayıb.
Oxu.Az xəbər verir ki, Makron bu barədə Fransanın cənubunun nasist işğalından azad edilməsinin 82-ci ildönümü münasibətilə Borm-le-Mimoza kommunasında keçirilən mərasimdə danışıb.
"Dünən parlamentin bir neçə həftə əvvəl qəbul etdiyi və Konstitusiya Şurasının bir neçə gün əvvəl təsdiqlədiyi hərbi planlaşdırma haqqında qanunu imzaladım. Sabah bu qanun rəsmi qəzetdə dərc olunacaq", - deyə Fransa prezidenti bildirib.
Dövlət başçısı qeyd edib ki, qanuna əsasən, 2027-2030-cu illərdə müdafiə ehtiyaclarına ayrılan xərclər 36 milyard avro artırılacaq.
Bu vəsait Silahlı Qüvvələrin müxtəlif istiqamətlərinin, o cümlədən informasiya təhlükəsizliyi və pilotsuz uçuş aparatlarının inkişafına yönəldiləcək.
Beləliklə, 2024-2030-cu illər üzrə proqram çərçivəsində Fransanın müdafiə sahəsinə ümumi xərcləri 400 milyard avrodan 436 milyard avroya yüksələcək.
Bu artım Parisə NATO qarşısında götürdüyü müdafiə xərclərini ölkənin ümumi daxili məhsulunun (ÜDM) 2.5 faizinə çatdırmaq öhdəliyini yerinə yetirməyə imkan verəcək.
