Dövlət Dumasının sədri Vyaçeslav Volodin Rusiyanın miqrasiya siyasətində dəyişikliklərlə bağlı qanun layihəsini parlament palatasının müvafiq komitəsinə təqdim edib.
Oxu.Az xəbər verir ki, bu barədə Dövlət Dumasının mətbuat xidməti məlumat yayıb.
Volodin qeyd edib ki, miqrasiya siyasətinin təkmilləşdirilməsi parlamentin aşağı palatası üçün prioritetdir. Sənəd artıq MDB işləri, Avrasiya inteqrasiyası və həmvətənlərlə münasibətlər üzrə müvafiq komitəyə təqdim edilib və prioritet məsələ kimi nəzərdən keçiriləcək.
Təşəbbüs "Rusiya Federasiyasında xarici vətəndaşların hüquqi statusu haqqında" Qanuna dəyişiklikləri ehtiva edir. Dəyişikliyə görə, miqrant işçilər həm özləri, həm də ailə üzvləri üçün sabit avans şəklində vergi ödəməlidirlər, onların ölkədə qalma müddəti isə əmək müqaviləsinin müddəti ilə bağlı olacaq.
18 yaşdan yuxarı uşaqların iş statusundan asılı olmayaraq Rusiyada qalmaq hüququ yoxdursa, 30 gün ərzində ölkəni tərk etmələri tələb olunacaq. Miqrantın gəliri məlum deyilsə və ya regional yaşayış minimumundan azdırsa, patent və ya iş icazəsi ləğv ediləcək.
Əgər iş fəaliyyəti 10 aydan az davam edirsə, müvəqqəti və ya daimi yaşayış icazəsinin verilməsindən imtina və ya artıq verilmiş icazənin ləğvi nəzərdə tutulur.
"Bu tədbirlər gəlir və qalma hüququnun monitorinqini gücləndirəcək, sosial infrastruktura düşən yükü azaldacaq. Heç bir iqtisadiyyat miqrantların sosial rifahı ilə maraqlanmır, onların təminatı ölkədə istehlak etdikləri mallarla uyğun olmalıdır", - deyə Volodin bildirib.
