Rusiyanın Uzaq Şərqindəki Primorye diyarı akvatoriyasında köpəkbalıqları qeydə alınıb.
Oxu.Az-ın xəbərinə görə, bu barədə yerli KİV balıqçılara istinadən məlumat verib.
Qeyd edilir ki, yırtıcılar həddindən artıq çox sayda tuna axınının regional sulara girməsi fonunda peyda olub. Balıqların miqrasiyası öz növbəsində dənizin erkən istiləşməsi və tunanın əsas qida mənbəyi sayılan ivasi (Uzaq Şərq sardinyası) balığının peyda olması ilə əlaqələndirilir. İvasi balığının Primorye akvatoriyası üzərindən kütləvi keçidi Tsuşima cərəyanının güclənməsi ilə izah olunur.
Balıqçılar iddia edirlər ki, əvvəllər Putyatin adası ərazisində mako köpəkbalığı tutulub. Bundan əlavə, bir neçə böyük köpəkbalığı Triozerye buxtasında katerlərə yaxınlaşıb. Onların sözlərinə görə, söhbət ağ köpəkbalıqlarından gedə bilər ki, onları həm də insan yeyən köpəkbalıqları adlandırırlar, bəzi şahidlər əvvəlcə onların delfinlər olduğunu düşünüblər.
