Səudiyyə Ərəbistanının Məkkə şəhərində yerləşən məsciddə "əxlaqsız hərəkətlərə yol verməkdə" təqsirləndirilən iki Banqladeş vətəndaşı edam edilib.
Oxu.Az xəbər verir ki, bu barədə SPA agentliyi krallığın Daxili İşlər Nazirliyinə (DİN) istinadən məlumat yayıb.
Edam olunanlar kişi və qadın olub.
Qeyd olunur ki, edam oktyabrın 14-də icra olunub. Məlumata görə, təqsirləndirilən şəxslər saxlanıldıqdan sonra polis tərəfindən hərtərəfli araşdırma aparılıb və iş aidiyyəti üzrə məhkəməyə göndərilib. Bu qərar cinayətin ağır olması və müsəlmanlar üçün müqəddəs sayılan şəhərdə məscidin toxunulmazlığının pozulması ilə əsaslandırılıb. Yuxarı instansiya məhkəməsinin təsdiqindən və kral fərmanının imzalanmasından sonra hökm qanuni qüvvəyə minib.
DİN öz bəyanatında hökumətin təhlükəsizliyə və İslam qanunlarına ciddi şəkildə əməl olunmasına sadiqliyini vurğulayıb.
Rəsmi açıqlamada kişi və qadının konkret olaraq nə etdikləri göstərilmir. Həmçinin, hadisənin baş verdiyi məscidin adı və ya iddia olunan cinayətin törədildiyi tarix qeyd olunmur.
Yerli KİV-in məlumatına görə, edam edilənlər Nazrul İslam Əbdül Bəsir və Siti Axtər olublar.
Banqladeş rəsmiləri bildiriblər ki, ölüm hökmlərinin çıxarılması və ya icrası barədə onlara əvvəlcədən heç bir məlumat verilməyib.
Banqladeş Xarici İşlər Nazirliyinin sözçüsü Şama Obayd bildirib ki, hadisənin detalları barədə ətraflı məlumat almaq üçün Səudiyyə tərəfinə rəsmi sorğu göndərilib.
Banqladeşin Ciddədəki Konsulluğu da bəyan edib ki, hökmlər icra olunmazdan əvvəl vətəndaşlarının edam ediləcəyi barədə onlara məlumat verilməyib.
