Ankarada evlənən cütlüyə dostları toyda qızıl əvəzinə ekzotik heyvanlar hədiyyə ediblər.
Oxu.Az Türkiyə mediasına istinadən xəbər verir ki, dostları uşaqlıqdan ekzotik heyvanlara böyük maraq göstərən və bunu hobbi halına gətirən Buğra Yalçına çubuq böcəyi, yaşıl iquana, uromastiks və Peter zolaqlı dərikərtənkələsi kimi heyvanlar bağışlayıblar.
Yalçın hədiyyələrdən çox sevindiyini bildirib. O, bağışlanan heyvanların Təbiəti Mühafizə və Milli Parklar Baş İdarəsi tərəfindən sənədlə qeydiyyata alındığını vurğulayıb.
Evində müxtəlif növ ekzotik heyvanlar saxladığını deyən Yalçın uromastiks, Peter zolaqlı dərikərtənkələsi, Sudan zirehli kərtənkələsi, Seneqal buqələmunu, "fire skink", Afrika kökquyruqlu gekkonu və iquananın da onların arasında olduğunu söyləyib.
O, ekzotik heyvanlara qulluq etməyin asan olmadığını bildirib:
"Onlara bacardığımız qədər yaxşı şəraitdə qulluq etməyə çalışırıq. Türkiyənin iqlim şəraiti ekzotik canlılar üçün uyğun deyil. İnsanlar bəzən onları sadəcə bir yerə qoyduğumuzu düşünürlər. İki gündən bir isti su ilə çimizdiririk, sirkəli parça ilə silirik, aloe vera bitkisi ilə masaj edib yenidən günəşə çıxarırıq. Bu, əslində, çox detallı və böyük zəhmət tələb edən hobbidir".
Yalçın dostlarının toyunda ona ekzotik heyvanlar hədiyyə etməsindən danışarkən "Çox xoşbəxt oldum. Mənim üçün qızıldan daha dəyərlidir. Onların hamısı mənim övladım kimidir. Uzun müddətdir onlara qulluq edirəm və çox xoşbəxtəm", - deyə bildirib.
O, həyat yoldaşının da bu hobbisinə dəstək verdiyini və hətta heyvanları özündən daha çox sevdiyini qeyd edib.
