Türkiyədə zəncirvari qəza: 25 avtomobil toqquşdu

Türkiyədə Bitlis-Tatvan avtomobil yolunda təxminən 25 avtomobilin iştirakı ilə zəncirvari qəza baş verib.

Bu barədə Oxu.Az Türkiyə KİV-ə istinadən xəbər verir.

İlkin məlumata görə, qəza nəticəsində 31 nəfər yaralanıb.

Bildirilir ki, qatı duman və buzlanma səbəbindən yük maşını, sərnişin mikroavtobusu, şəhərdaxili mikroavtobus və çox sayda minik avtomobili toqquşub, əksəriyyəti yararsız hala düşüb.

Qəzadan sonra yol hər iki istiqamətdə nəqliyyatın hərəkətinə bağlanıb.

Hadisə yerinə çoxlu sayda təcili yardım, xilasetmə qrupları və polis qüvvələri cəlb ediliblər.

Eyni zamanda, qəza səbəbindən kilometrlərlə uzanan tıxacın yarandığı bölgədə işlər davam edir.