Ukrayna döyüşləri dayandırmağa və Rusiyanın artıq əlində olan əraziləri güzəştə getməyə razılaşa bilər. Bu, Avropanın dəstəklədiyi sülh planının bir hissəsi kimi baş verə bilər. Hazırda diplomatik dairələrdə Ukrayna Prezidenti Volodimir Zelenskinin mövqeyinin yumşalması müzakirə edilir.
Oxu.Az-ın xəbərinə görə, bu barədə "The Telegraph" nəşri Avropa mənbələrinə istinadən məlumat verib.
Qeyd olunub ki, Ukrayna Rusiyanın Luqansk, Donetsk, Zaporojye, Xerson vilayətləri və Krımda artıq işğal olunmuş ərazilər üzərində nəzarətinin faktiki olaraq tanınması ilə hərbi əməliyyatların dayandırılması variantını nəzərdən keçirməyə hazırdır. Bu plan xaricdə cəbhə xəttinin dondurulması demək olardı.
Kiyev və onun müttəfiqləri arasında həftəsonu aparılan diplomatik danışıqları xarakterizə edən Qərb rəsmilərindən biri məsələ ilə bağlı fikrini bildirib.
"Bu plan ancaq hərbçilərin hazırkı mövqeləri ilə əlaqələndirilə bilər", - deyə o qeyd edib.
Bu arada nəşr vurğulayıb ki, Ukrayna və Avropa ABŞ Prezidenti Donald Tramp və Rusiya Prezidenti Vladimir Putinin Kiyevə məhəl qoymadan uzunmüddətli müharibəyə son qoymaq barədə razılığa gələ biləcəklərindən getdikcə daha çox narahat olmağa başlayırlar. Avropanın əsas narahatlığı isə Moskvanın təsdiqlədiyi iddia edilən sülh planı olub ki, bu plan Kiyevin öz nəzarətində olan Donetsk və Luqansk vilayətlərindən qoşunları çıxarmağa razılıq verəcəyi təqdirdə Ukraynanın cənub-şərqində cəbhə xəttinin dondurulmasını nəzərdə tuturdu.
"Ukrayna ərazilərin güzəştə gedilməsinə razılaşmış kimi görünsə də, yalnız silah tədarükü və NATO-ya üzvlük yolu ilə etibarlı təhlükəsizlik zəmanətləri təklif edən sülh nizamlanması ilə razılaşacaq", - deyə "The Telegraph" yazıb.
Aralarında Fransa Prezidenti Emmanuel Makron, Polşanın Baş naziri Donald Tusk və Almaniya kansleri Fridrix Mertsin olduğu Avropa liderləri beynəlxalq səviyyədə tanınmış sərhədlərin güc yolu ilə dəyişdirilməsinin qəbuledilməz olduğunu bəyan ediblər. Onlar Putinlə danışıqlardan əvvəl öz fikirlərini bildirmək üçün avqustun 13-də Trampla görüşməyi planlaşdırırlar. Avropa Komissiyası, Fransa, İtaliya, Böyük Britaniya, Polşa və Finlandiya liderlərinin birgə bəyanatında deyilir ki, "hazırkı təmas xətti danışıqların başlanğıc nöqtəsi olmalıdır".
