Yanukoviçin Madriddə güllələnən sabiq müşavirinin qətli ilə bağlı GÖRÜNTÜLƏR yayıldı

Ukraynanın sabiq Prezidenti Viktor Yanukoviçin keçmiş müşaviri və Prezident Administrasiyası rəhbərinin sabiq müavini Andrey Portnovun qətli ilə bağlı görüntülər yayılıb.

Oxu.Az-ın verdiyi məlumata görə, kadrları İspaniyanın təcili tibbi yardım xidmətləri dərc edib.

Videoda hadisə yerində olan təcili tibbi yardım maşınları və cinayət yerini sənədləşdirən hüquq-mühafizə orqanlarının əməkdaşları əks olunub. Kadrlarda cəsəd gözə dəyməsə də, İspaniya mətbuatında yayımlanan bəzi fotolarda asfalt üzərində idman ayaqqabısı geyinmiş bir şəxs görünür.

15:48

Ukraynanın sabiq prezidenti Viktor Yanukoviçin keçmiş müşaviri və Prezident Administrasiyası rəhbərinin sabiq müavini Andrey Portnov İspaniyanın paytaxtı Madriddən bir qədər aralıda silahlı hücum nəticəsində öldürülüb.

Oxu.Az-ın məlumatına görə, bu barədə İspaniyanın "Cadena SER" radiostansiyası xəbər yayıb.

Bildirilib ki, Portnov mayın 9-da Madridin elit yaşayış rayonlarından biri olan Posuelo-de-Alarkonda güllələnib. O, dörd güllə yarasını sinə nahiyəsindən, birini isə baş nahiyəsindən alıb. Hücumun xüsusi qəddarlıqla və sifarişli qətl üslubunda həyata keçirildiyi vurğulanıb.

Məlumata əsasən, Portnov hücumdan əvvəl övladlarını məktəbə aparandan sonra avtomobilinə qayıdarkən naməlum şəxs tərəfindən güllələnib.

Cinayətkar hadisə yerindən qaçaraq gizlənib. Şahidlərin bildirdiyinə görə, o, mavi idman geyimində olub. Araşdırma orqanları onun tək hərəkət etmədiyini, arxada onu müşayiət edən və qaçışını təmin edən şəxslərin də ola biləcəyini istisna etmir.

İspaniya polisi hadisənin sifarişli qətl olduğunu istisna etmir və hazırda bir neçə versiyanı nəzərdən keçirir: əsas ehtimallar arasında siyasi motivlər və maliyyə borcları ilə bağlı şəxsi düşmənçilik dayanır.

Qeyd edək ki, Portnov əvvəllər Yuliya Timoşenkonun komandasında çalışsa da, 2010-cu ildən sonra Yanukoviçin komandasına keçib və məhkəmə sisteminə nəzarət edib. 2014-cü il Maydan hadisələrindən sonra ölkəni tərk edərək bir müddət Vyanada yaşayıb. Onun adı Ukraynada korrupsiya və digər cinayət işlərində hallanıb, lakin sonradan sanksiyalardan azad olunmuşdu.

Hazırda istintaq davam edir, rəsmi açıqlama verilməyib.