Vaşinqtonda QALMAQAL: Trampın köməkçisi iş yazışmalarını şəxsi poçtdan aparıb

ABŞ prezidentinin milli təhlükəsizlik üzrə köməkçisi Mayk Uolts və Ağ Evin Milli Təhlükəsizlik Şurasının (MTŞ) digər üzvləri xidməti yazışmalar üçün "Gmail" elektron poçtundan istifadə ediblər.

Oxu.Az-ın məlumatına görə, bu barədə "The Washington Post" qəzeti öz mənbələrinə istinadən məlumat yayıb.

Bildirilir ki, Uolts öz qrafikini, iş sənədlərini və digər faylları göndərmək üçün "Google" poçt xidmətindən istifadə edib.

"Şəxsi elektron poçtdan istifadə hətta məxfi olmayan materiallar üçün belə risklidir, nəzərə alsaq ki, xarici kəşfiyyat xidmətləri milli təhlükəsizlik üzrə köməkçi kimi yüksək vəzifəli hökumət məmurlarının yazışmalarına və cədvəllərinə xüsusi əhəmiyyət verirlər", - deyə nəşrdə qeyd edilir.

Mənbələrdən birinin bildirdiyinə görə, Uolts, həmçinin Somalidəki vəziyyəti və Ukraynada hərbi əməliyyatların gedişatını müzakirə etmək üçün "Signal" mesencerində qruplar yaradıb.

MTŞ-nin mətbuat katibi Brayan Hyuz bu məlumatları təkzib edərək, Uolts və həmkarlarının iş yazışmalarında yalnız xüsusi şifrələnmiş platformalardan istifadə etdiklərini bildirib.

"Uolts məxfi məlumatları açıq hesaba göndərməyib və göndərməzdi", - deyə Hyuz qeyd edib.

Xatırladaq ki, "Atlantic" jurnalının baş redaktoru Ceffri Qoldberq martın 24-də məqalə dərc edib. Məqalədə bildirilir ki, martın 11-də o, Mayk Uolts adlı istifadəçidən "Signal" mesencerinə qoşulmaq üçün sorğu alıb. İki gün sonra jurnalistə ABŞ administrasiyası üzvlərinin Yəmənə zərbələrin müzakirə edildiyi qrup çatına daxil edilməsi barədə bildiriş gəlib. Jurnalistin iddia etdiyinə görə, martın 15-də Pit Heqset (ABŞ müdafiə naziri) adlı istifadəçi husilərə qarşı gözlənilən zərbələrin təfərrüatları və əməliyyatın başlanması üçün ehtimal olunan müddətlər barədə məlumat paylaşıb ki, Qoldberqin sözlərinə görə, bu, sosial şəbəkələrdə bombardmanlar haqqında ilk məlumatların dərc olunma vaxtı ilə üst-üstə düşüb.

Yeri gəlmişkən, martın 15-də ABŞ Trampın əmri ilə Yəmən ərazisinin təxminən üçdə birini nəzarətdə saxlayan husilərin obyektlərinə kütləvi zərbələr endirməyə başlayıb.

ABŞ Demokratlar Partiyası "Signal" vasitəsilə məlumat sızmasını Trampın respublikaçı administrasiyasının böyük uğursuzluğu hesab edib. ABŞ Konqresində və ekspert cəmiyyətində Uolts və prezident komandasının bəzi digər nümayəndələrinin işdən çıxarılması çağırışları da səslənir.