Nurməhəmmədovun atası oğlunu cəzalandıracağına söz verdi

Rusiyalı döyüşçü Həbib Nurməhəmmədovun atası və məşqçisi Əbdülmanap döyüşdən sonrakı davaya görə oğluna qarşı sərt tədbirlər görəcəyini bəyan edib.

Oxu.Az-ın xəbərinə görə, o, bu barədə Rusiya telekanalına açıqlamasında deyib.

“Oktaqonda nə istəyirsən, edirsən. Ondan kənarda isə uşaqlar, qadınlar və kənar şəxslər var. Mənim komandam həmişə nizam-intizamı ilə seçilib. Buna görə Həbibə qarşı sanksiyalar UFC tərəfindən tətbiq olunanlardan daha sərt olacaq”, - Nurməhəmmədovun atası deyib.

O əlavə edib ki, baş verənlərə görə birbaşa məsuliyyət daşıyır.

Xatırladaq ki, UFC 229 turnirində Makqreqor üzərindəki qələbədən sonra Nurməhəmmədov onu təhqir edən irlandiyalı Dillon Denisə hücum edərək kütləvi davaya səbəb olub.

Qeyd edək ki, Həbib Nurməhəmmədov peşəkar karyerasında 27 döyüşün hamısında qələbə qazanıb. O, ilk dəfə yüngül çəki dərəcəsində çempion titulunu qoruyub. 

UFC prezidenti Deyn Uayt bəyan edib ki, rusiyalı idmançı kəmərindən məhrum edilə bilər.

www.oxu.az