İyulun 8-də Qrinviç vaxtı ilə saat 11:15-də (Bakı vaxtı ilə saat 16:15) planet sakinlərinin təqribən 99 faizi eyni vaxtda günəş işığını müşahidə edəcək.
Oxu.Az xəbər verir ki, bu barədə "Al Jazeera" məlumat dərc edib.
Yerin fırlanma oxunun mailliyi və Şimal yarımkürəsində yayın başlanması sayəsində dünya əhalisinin təxminən 99 faizi - təxminən 8.2 milyard insan - iyulun 8-də Qrinviç vaxtı ilə təxminən saat 11:15-də eyni anda günəş işığını və ya qüruböncəsi alaqaranlığı yaşayacaq.
Təxminən bir dəqiqə davam edən qısa bir müddət ərzində Yer üzünün ən çox əhali yaşayan bölgələri günəşli olacaq, insanların çox az bir qismi isə qaranlıqda qalacaq.
Bu zaman kəsiyində Şimali və Cənubi Amerika, Avropa, Afrika materikləri, eləcə də əhalinin əsas hissəsinin məskunlaşdığı Asiyanın böyük bir ərazisi gündüz işığı ilə işıqlanacaq.
Avstraliya, Yeni Zelandiya, Antarktida qitəsi, Cənub-Şərqi Asiyanın bir sıra bölgələri və bu ərazilərin ətrafındakı okeanlar isə həmin vaxt qaranlıqda olacaq.
