Göz qapaqlarının səyirməsinin əsas səbəbi miokimiyadır. Bu proses yorğunluqdan sonra digər əzələlərin titrəməsinə bənzəyən, göz qapağı əzələlərinin qeyri-ixtiyari yığılmasıdır. Adətən, miokimiya bir neçə gün, ən çoxu bir-iki həftə davam edir və öz-özünə aradan qalxır.
Oxu.Az xəbər verir ki, bu barədə rusiyalı həkim-oftalmoloq Anton Kazantsev "Gazeta.ru" nəşrinə açıqlamasında məlumat verib. O, göz səyirməsinin yaranma səbəbləri, bu halın inkişaf mexanizmi və hansı hallarda mütəxəssisə müraciət etməyin vacibliyi barədə danışıb.
"Müasir həyat tərzi bu vəziyyətə birbaşa təsir göstərir. Əsas amillərə stres, yuxu çatışmazlığı, yorğunluq və stimullaşdırıcı vasitələrin - kofein, nikotin, spirtli içkilərin qəbulu daxildir. İstər müsbət, istərsə də mənfi xarakterli stres və emosional gərginlik sinir sisteminə mənfi təsir edir. İş və istirahət rejimini növbələmək, fiziki aktivlik və təmiz havada gəzintilər vasitəsilə stres səviyyəsini azaltmaq mümkündür", - deyə həkim izah edib.
Həkimin sözlərinə görə, müxtəlif özünütənzimləmə üsulları, yüngül tənəffüs məşqləri və ya yoqa, həmçinin tamdəyərli istirahət qısa müddətdə müsbət nəticə verir. Yuxu çatışmazlığı orqanizmin bərpa proseslərinin pozulmasına gətirib çıxarır və yorğunluğu daha da artırır. Miokimiyanın qarşısını almaq üçün gün rejimi və yuxunu qaydaya salmaq olduqca vacibdir, çünki sinir sistemi məhz gecə saatlarında bərpa olunur. Qaranlıq otaqda 7-8 saat yatmaq, hər gün eyni vaxtda yuxuya gedib oyanmaq tövsiyə edilir.
Kofein sinir sistemini oyadır və nəticədə göz qapaqlarında kiçik yığılmalara səbəb olur. Spirtli içkilər və tütün məmulatları isə damar sisteminə təsir edərək sinir toxumasını güclü şəkildə qıcıqlandırır. Səyirmə dövründə kofein qəbulunu gündə bir fincana qədər azaltmaq, energetik içkilərdən, spirt və nikotindən isə tamamilə imtina etmək faydalıdır.
"Bir çox insan kompüter arxasında işləyərkən, kitab oxuyarkən və ya qadcetlərdən istifadə edərkən gözlərini həddindən artıq gərginləşdirir. Göz əzələlərinin və sinir uclarının hədsiz yorulması da göz qapaqlarının səyirməsinə yol aça bilər. Ekran qarşısında işləyərkən mütəmadi fasilələr tələb olunur: hər 20 dəqiqədən bir 20 saniyə ərzində təxminən 6 metr uzaqlığa baxmaq lazımdır. Bu yolla əzələ gərginliyi azalır", - deyə oftalmoloq xatırladıb.
Səyirmənin digər səbəbi göz quruluğu, küləkli hava, kondisioner altında işləmək və ya kontakt linzalardan uzun müddət istifadə nəticəsində selikli qişanın qıcıqlanması ola bilər. Belə hallarda oftalmoloqun təyinatı ilə xüsusi göz damcılarından istifadə kömək edir.
Əksər hallarda miokimiya təhlükəsizdir və müalicəsiz keçib gedir. Lakin ümumi vəziyyətə diqqət yetirmək mütləqdir: əgər səyirmə iki-üç həftədən çox davam edərsə, güclü spazm, göz qapağının tamamilə qapanması və ya üzün digər nahiyələrinə yayılması ilə müşayiət olunarsa, mütləq mütəxəssisə müraciət edilməlidir. Müalicə barədə qərar oftalmoloq, nevroloq və bəzən psixoterapevtin iştirakı ilə ortaq şəkildə qəbul edilir.
