"Yay aylarında kondisioneri 24-25 dərəcəyə tənzimləmək ən uyğun seçimdir. Bu temperatur rejimi bədəni qəfil soyutmadan məkanı sərinləşdirməyə imkan yaradır".
Oxu.Az xəbər verir ki, bu barədə Rusiya mətbuatına müsahibəsində terapevt və immunoloq İrina Yartseva məlumat verib.
Rusiyalı mütəxəssis isti günlərdə zökəm, boğazağrısı və soyuqdəymə riskini azaltmaq üçün kondisionerdən düzgün istifadə qaydalarını izah edib.
Yartseva kondisioneri əvvəlcədən - məsələn, işə başlamazdan və ya yuxuya getməzdən bir saat öncə yandırmağı tövsiyə edir. Belə olduqda otaq sərinləməyə vaxt tapır və cihaz güclü hava axını yaratmadan, sadəcə mövcud temperaturu qorumaq üçün çalışır.
Həkim xəbərdarlıq edir ki, xüsusən çöldə hava 30 dərəcə isti olduğu halda, otağı qəfil 18 dərəcəyə qədər soyutmaq olmaz. Çünki kəskin temperatur fərqi orqanizm üçün ciddi sınaqdır. Bundan əlavə, birbaşa soyuq hava axınının altında əyləşmək məsləhət deyil; bu, bədənin həddindən artıq soyumasına və əzələ ağrılarına səbəb ola bilər. Havanın birbaşa insanın üzərinə vurmaması üçün cihazın pərlərini yuxarıya doğru istiqamətləndirmək daha doğrudur.
Kondisionerlərin yaratdığı digər bir problem isə quru havadır. Yartsevanın fikrincə, cihaz havadakı nəmi azaltdığı üçün burun və boğazın selikli qişaları quruya, qıcıqlanma və narahatlıq yarana bilər.
Ev şəraitində yataq otağını əvvəlcədən sərinlətmək, gecə isə kondisioneri təxminən 24 dərəcədə, səssiz və ya "eko" rejimdə saxlamaq məqsədəuyğundur. Ofisdə isə həkim cihazı qəfil tam gücü ilə yandırmamağı, bunun əvəzinə rahat temperaturu sabit saxlayacaq şəkildə tənzimləməyi məsləhət görür.
