"Bədən rahatlığı yadda saxlayır" - Somatik yoqanın gücü nədədir?

"Nine Senses Fest 2025" festivalında keçiriləcək somatik yoqa təlimi vasitəsilə bədənimizin dərin əzələlərində yatan hissləri anlamağı və onları idarə etməyi öyrənəcəyik".

Bu sözləri "Nine Senses Fest 2025" festivalının açılış mərasimində Oxu.Az -a açıqlamasında somatik yoqa təlimçisi Dilşad Cəfərli deyib.

O, mayın 4-ü keçiriləcək festivalda somatik yoqa təliminə rəhbərlik edəcəyini söyləyib:

"Somatik yoqa vasitəsilə bədənimizdə olan stresi idarə etməyi, görməyi öyrənirik. Həmişə "stresdən qaçın" deyilir, lakin stres çox da qorxulu bir şey deyil. Somatik yoqa vasitəsilə biz stresi anlayıb onun bizə nə zaman zərər verdiyini öyrənib öz xeyrimizə istifadə etməyi öyrənəcəyik".

Dilşad Cəfərli qeyd edib ki, istənilən stresi idarə etmək üçün somatik yoqadan əlavə nəfəs texnikasından istifadə etmək lazımdır:

"Stres keçirən insanın qarın nahiyəsində ağrılarının olduğunu müşahidə edirik. Çünki bizim bağırsaqlarımız ikinci beynimizdir. Oradan keçən sinirlər sıxışmağa başlayanda qarın nahiyəsində ağrılar baş qaldırır.

Nəfəs texnikasından istifadə etdikcə, nəfəsi diafraqmadan alıb-verdikcə əzələlər rahatlamağa başlayır. Qarın əzələləri, həmçinin bağırsaqları sıxan sinirlər varsa, onlar rahatlayır. Bunun vasitəsilə hər kəs öz streslərini idarə edə bilər.

İnsanlar fərqli olduğu kimi, stres faktorlarımız və ona reaksiyalarımız da fərqlidir. Bizim üçün vacib olan stresi tanımaq, stresdən qaçmadan onunla dil tapmaqdır.

Əlimdən gəldiyi qədər çalışacağam ki, somatik yoqa məşğuliyyətimiz zamanı qısa zaman kəsiyində insanlara stresi idarə etməyi öyrədim. Əlbəttə ki, bir seansa hər hansı bir texnikanı yadda saxlamaq çətin ola bilir, lakin bizim orqanizmimiz çox ağıllıdır, o bir dəfə rahatlığı daddıqda intiutiv olaraq həmin davranışı axtarıb özünə gətirməyə çalışır. Yoqa praktikası vaxtı da diqqətimiz özümüzdə olsa, bədənimizi rahatlaşdırsaq, festivaldan sonra da intiutiv olaraq bunu həyata keçirəcəyik".

Aygün Mirakif