Məşhur kanadalı rok ifaçısı Brayan Adams Kanadanın Amerika Birləşmiş Ştatlarına 51-ci ştat olaraq birləşməyəcəyini vurğulayan yeni musiqi parçası təqdim edib.
Oxu.Az xəbər verir ki, bu məlumatı "National Post" nəşri yayıb.
Diqqətçəkən məqam odur ki, "We'll never be the 51st state" ("Biz heç vaxt 51-ci ştat olmayacağıq") adlı mahnının təqdimatı dövlətin başlıca milli bayramı sayılan 1 iyul - Kanada Gününə təsadüf edib. Müxtəlif yayım platformalarında yerləşdirilən kompozisiyada ABŞ və Kanada arasındakı dostluq əlaqələri, eləcə də azadlıq və hüquqlar naminə ortaq mübarizə xatırlanır. Həmçinin sənətçi öz mahnısında kanadalıların öz vətənlərinin növbəti Amerika ştatına çevrilməsinə heç vaxt imkan yaratmayacaqlarını xüsusi qeyd edir.
Xatırladaq ki, ABŞ-nin rəhbəri Donald Tramp bir neçə dəfə Kanada vətəndaşlarının böyük qisminin 51-ci ştat olmağı dəstəklədiyinə inandığını bildirmişdi. Buna reaksiya olaraq Baş nazir Mark Karni Kanadanın heç bir zaman ABŞ-nin tərkibinə daxil olmayacağını bəyan etmişdi.
