Nikolas Keyc 1964-cü ilin yanvarında Los-Ancelesdə dünyaya gəlib. Atası ədəbiyyat professoru, anası isə rəqqasə olub. Anasının psixi problemləri və valideynlərinin boşanması onun uşaqlığını çətinləşdirib və emosional dünyasına dərin təsir göstərib.
Əsl soyadı Koppola olan Nikolas məşhur rejissor Frensis Ford Koppolanın qardaşı oğludur. Lakin Hollivudda qohumluğu ilə deyil, istedadı ilə tanınmaq üçün komiks qəhrəmanı Lük Keycdən ilhamlanaraq "Keyc" soyadını götürüb. O, "Valley Girl" ("Dərə qızı") filmi ilə tanınıb, daha sonra "Leaving Las Vegas" ("Las Veqası tərk etmək") filmindəki rolu ilə "Oscar" qazanıb və "The Rock" ("Qaya"), "Con Air" ("Hava həbsxanası"), "Face/Off" ("Simasız") kimi filmlərlə döyüş-macəra ulduzuna çevrilib. Şəxsi həyatı da filmləri kimi dramatik olub.
Elvis Preslinin qızı Liza Mari Presli ilə evliliyi cəmi 108 gün davam edib. Milyonlarla dollar dəyərində mülk, ada və əşyalar alsa da, sonradan borca düşüb və maliyyə böhranı yaşayıb. Buna baxmayaraq, "Mandy" ("Mendi") və "Pig" ("Donuz") filmləri ilə sənətinə dönüş edib. Nikolas Keyc komiksləri sevir və nadir əşyalar toplayır. 2007-ci ildə 70 milyon illik dinozavr kəlləsini 276 min dollara alıb. Bir neçə dəfə evlənib, hazırda yaponiyalı Riko Şibata ilə ailəlidir və bir qızı var. Hazırda Nikolas Keyc fərqli obrazlarda və janrlarda çıxış etməklə aktyorluq gücünü nümayiş etdirməyə davam edir.
Daha ətraflı Baku TV-nin videomaterialında:
