"Kibertəhlükəsizlikdən danışarkən adətən dövlət sistemlərinin, maliyyə infrastrukturunun və kritik obyektlərin qorunmasını nəzərdə tuturuqsa, informasiya təhlükəsizliyinin bir başqa, bəlkə də ən vacib ölçüsü var ki, bu da cəmiyyətin ən həssas üzvləri olan uşaqlarımızın sürətlə dəyişən rəqəmsal mühitdə qorunması məsələsidir".
Oxu.Az xəbər verir ki, bunu Milli Məclisinin Xarici müdaxilələrə və hibrid təhdidlərə qarşı müvəqqəti komissiyasının "Rəqəmsal inkişaf, süni intellekt və uşaqların sosial şəbəkə platformalarındakı zərərli təsirlərdən qorunması" mövzusunda ictimai dinləmədə komissiyanın sədri, deputat Ramid Namazov deyib.
O bildirib ki, uşaqlar və yeniyetmələr üçün sosial media platformalarında geniş yayılan kiberzorakılıq, kiberqısnama, yaşa uyğun olmayan məzmuna məruz qalma və onlayn cinsi zorakılıq edən şəxslər ("online predator") tərəfindən istismar riski ciddi narahatlıq doğurur:
"Azərbaycanda bir çox ailələr bu risklərdən tam xəbərdar deyil və ya övladlarının onlayn fəaliyyətini effektiv şəkildə monitorinq etmək üçün alətlərə malik deyillər. Digər istifadəçilərin reallığı əks etdirməyən həyat təsvirləri ilə özlərini müqayisə etmələri nəticəsində bu, uşaq və yeniyetmələrdə sosial media asılılığı, heysiyyət problemləri, depressiya və narahatlıq kimi hallara səbəb olur".
"Azərbaycanda uşaqların yaşa uyğun informasiya əldə etmək və zərərli informasiyadan mühafizəsi hüquqi cəhətdən hələ 2018-ci ildə qəbul edilən "Uşaqların zərərli informasiyadan qorunması haqqında" qanunla tənzimlənir. Lakin sosial şəbəkə platformalarının bu illər ərzində keçdiyi transformasiya, sadə ünsiyyət vasitəsindən çoxşaxəli, alqoritmlə idarə olunan, bir çox hallarda isə manipulyativ dizayn həllərindən istifadə edən nəhəng ekosistemlərə çevrilməsi daha dəqiq tənzimləmə mexanizmlərini zəruri etdi. "Google" şirkətin məlumatlarına görə, 2025-ci il ərzində icma qaydalarını pozduğu üçün dünya üzrə 15.8 milyondan çox "YouTube" kanalı bağlanıb və 245.7 milyondan çox "YouTube" videosu silinib. Bundan da 24.1 milyondan çox video uşaqların təhlükəsizliyi ilə bağlı olduğu üçün silinib. Bu kifayət qədər böyük rəqəmlərdir. Təsəvvür edin, uşaqlarla bağlı statistikanı digər platformalar da ictimaiyyətə açıqlasa, vəziyyətin nə qədər kritik olduğu hər kəsə məlum olar", - deyə deputat vurğulayıb.
Deputat əlavə edib ki, ölkəmizdə uşaq hüquqlarının müdafiəsindən danışarkən mütləq Mehriban Əliyevanın bu sahədə xidmətləri və onun rəhbərlik etdiyi Heydər Əliyev Fondunun fəaliyyətləri qeyd olunmalıdır:
"Uşaqların təhlükəsizliyi, o cümlədən onların rəqəmsal/onlayn məkanda müdafiəsi hər zaman onun üçün prioritet mövzular sırasında olub.
Bu baxımdan, Mehriban xanımın həm Rəqəmsal İnkişaf Şurasının sədri, həm də uşaqların rifahının uzunmüddətli müdafiəçisi olması, rəqəmsal siyasətin təkcə iqtisadi səmərəlilik və texnoloji irəliləyiş prizmasından deyil, həm də insani, humanizm tərəfdən formalaşdırıldığının bir göstəricisidir".
