Azərbaycanlı atlet Ramil Quliyev 2018-ci il üçün Türkiyənin ən yaxşı idmançısı seçilib.
Oxu.Az xəbər verir ki, 65-ci dəfə "Gillette" və "Milliyyət" qəzetinin birgə keçirdiyi mükafatlandırılma mərasimi "Volkswagen Arena"da baş tutub.
Ramil Quliyev bu nominasiyada güləş üzrə dünya çempionları – Yasemin Adar, Taha Akgül, Metehan Başar, kamandan oxatma üzrə dünya ikincisi Mete Qazoz və basketbolçu Cedi Osmanı məğlub edib. "İlin İdmançısı" mükafatını ona Türkiyənin Gənclik və İdman naziri Mehmet Muharrem Kasapoğlu verib.
Qeyd edək ki, Ramil Quliyev ötən il də Türkiyənin ən yaxşı idmançısı seçilmişdi. O, dekabrda Balkan Atletik Federasiyaları Assosiasiyası tərəfindən “İlin kişi atleti” mükafatını da qazanmışdı.
Xatırladaq ki, 200 metr məsafəyə qaçışda dünya və ikiqat Avropa çempionu (komanda) olmuş Ramil Quliyev ötən ilin avqustunda Almaniyanın paytaxtı Berlində keçirilmiş qitə çempionatının (fərdi) qalibi adını qazanıb.
Səbuhi MUSAYEV
