Əliağa Əzizov: "Şirvan kanalının yenidən qurulması layihəsi davam etdirilir"

"Hazırda Bakıdakı Böyükşor gölünün ekoloji vəziyyətinin yaxşılaşdırılması, "Ağ Şəhər" ərazisində tullantı sularının idarə olunması və təmizlənmiş suların sənaye, kənd təsərrüfatı və yaşıllıqlar üçün təkrar istifadəsi istiqamətində də işlər aparılır. Hacıqabul rayonundakı eyniadlı gölün ekoloji vəziyyətinin bərpası planlaşdırılır".

Oxu.Az xəbər verir ki, bunu Azərbaycan Dövlət Su Ehtiyatları Agentliyinin (ADSEA) Elm və İnnovasiyalar sektorunun müdiri Əliağa Əzizov "Kommunal İnfrastrukturun inkişafına dair sual və təkliflərin müzakirəsi" mövzusunda keçirilən "Milli Biznesin İnkişafı Forumu"nda bildirib.

Onun sözlərinə görə, Azərbaycanın əsas suvarma arteriyalarından biri olan Şirvan kanalının yenidən qurulması layihəsi də davam etdirilir:

"Layihə çərçivəsində kanalın ötürmə gücü saniyədə 78 kubmetrdən 180 kubmetrə çatdırılacaq, uzunluğu isə 122 kilometrdən 204 kilometrə qədər artırılacaq. Nəticədə 228 min hektar sahənin suvarma təminatı yaxşılaşdırılacaq".

Sektor müdiri əlavə edib ki, Səudiyyə Ərəbistanının "ACWA Power" şirkəti ilə birgə dəniz suyunun duzsuzlaşdırılması layihəsi həyata keçirilir:

"Sumqayıt Kimya Sənaye Parkında gündəlik 300 min kubmetr içməli su istehsal edəcək zavodun tikintisi nəzərdə tutulur. Zavodun inşası 2.5 il ərzində tamamlanacaq və növbəti 25 il ərzində konsorsium tərəfindən idarə olunacaq.

Ölkədə formalaşan su ehtiyatlarının 25%-i Qarabağ və Şərqi Zəngəzur iqtisadi rayonlarının payına düşür. İşğal dövründə bu ərazilərin su təsərrüfatı infrastrukturu ciddi zərər görmüşdü. Artıq Suqovuşan, Xaçınçay, Köndələnçay-1, Köndələnçay-2 və Aşağı Köndələnçay su anbarlarının bərpası başa çatıb. Zabuxçay su anbarının tikintisi yekunlaşmaq üzrədir. Həkəriçay və Bərgüşadçay su anbarlarının isə texniki-iqtisadi əsaslandırma işləri davam etdirilir".

Məhərrəm Əliyev