"Türkiyənin DEM Partiyasının (Xalqların Bərabərlik və Demokratiya Partiyası) İstanbuldan millət vəkili və Türkiyə Böyük Millət Məclisinin (TBMM) sədr müavini Sırrı Süreyya Önder hazırda reanimasiyadadır. Onun vəziyyəti dünənə nisbətən yaxşıdır, müalicəyə cavab verir".
Oxu.Az-ın "Haber Global"a istinadla verdiyi məlumata görə, bu barədə onun həkimi professor Çavlan Çiftçi xəbər verib.
Onun sözlərinə görə, millət vəkili 10-40 gün arasında süni komada saxlanıla bilər.
"İnfeksiyadan qorunması üçün güclü antibiotiklər verilir", - deyə məlumatda vurğulanıb.
Xatırladaq ki, DEM Partiyasının İstanbuldan olan deputatı Sırrı Süreyya Önder dünən ürəyindəki ciddi problem səbəbilə 12 saatlıq ağır əməliyyat keçirib. Bildirilir ki, o, xəstəxanaya gətiriləndə nəbzi olmayıb, yalnız 10 dəqiqəlik ürək masajından sonra qan dövranı düzəlib. Həkimlərin sözlərinə görə, onda "aort diseksiyası" (ürəkdən çıxan əsas damarların yırtılması) aşkar edilib. Əməliyyat uğurlu keçsə də həkimlər onun vəziyyətini ağır qiymətləndiriblər və həyatına təhlükənin davam etdiyini, xüsusilə beyin funksiyalarına dair narahatlıqlar olduğunu deyiblər.
