Prezident Donald Tramp ABŞ Konqresinə keçirilən aralıq seçkisindən sonra milli təhlükəsizlik üzrə komandası ilə birlikdə İrana dair ilk müşavirəsini keçirib.
Oxu.Az xəbər verir ki, bu barədə "Axios" nəşri məlumatlı mənbələrə istinadən yayıb.
"Cümə axşamı günü Tramp və onun milli təhlükəsizlik üzrə əsas məsləhətçiləri həftəlik kəşfiyyat brifinqi çərçivəsində seçkidən sonra ilk dəfə İran məsələsi ilə bağlı toplaşıblar", - deyə portalın həmsöhbəti qeyd edib.
Daha öncə yayılan məlumatlara görə, Birləşmiş Ştatlar rəhbəri İranla bağlı üç fəaliyyət planını nəzərdən keçirib: Tehrana qarşı yeni zərbələr endirmək, iqtisadi təzyiqləri davam etdirmək və ya razılaşma əldə etmək.
Komandası ilə görüşü başa çatdıqdan sonra Tramp media nümayəndələrinə açıqlamasında "Artıq biz qərar verəcəyik", - deyə bildirib.
"Mümkündürsə, ölkənin qalan hissəsini məhv etməməyə üstünlük verərdim, lakin ola bilsin ki, bunu etməyə məcbur olum. Yaxın zamanda bunu biləcəksiniz", - deyə o, əlavə edib.
Nəşrin mənbələrinin məlumatına əsasən, ABŞ Silahlı Qüvvələrinin Mərkəzi Komandanlığı (CENTCOM) Vaşinqtondan yeni təlimatlar almasa da, İranda irimiqyaslı hərbi əməliyyatların mümkün bərpasına hazırlıq işlərini yekunlaşdırır.
Nəşr vurğulayır ki, ABŞ Hərbi Dəniz Qüvvələrinin üçüncü təyyarədaşıyan zərbə qrupunun Yaxın Şərqə gəlməsi ABŞ-nin yenidən zərbələr endirməyi planlaşdırdığına dair əsas siqnallardan biri ola bilər.
Portalın məlumatçısı bildirib ki, "Teodor Ruzvelt" esminesi və onun zərbə qrupu cümə günündən etibarən bir neçə gün Sinqapurda qalacaq. Həmin qrupun Yaxın Şərqə gəlişi isə noyabr ayının ortalarından tez baş tutmayacaq.
