ABŞ-nin paytaxtı Vaşinqtonda havanın təhlükəli səviyyədə çirklənməsi səbəbindən "qırmızı kod" elan edilib. Buna anomal istilər və Müstəqillik Günü münasibətilə təşkil olunan genişmiqyaslı atəşfəşanlıq səbəb olub.
Oxu.Az xəbər verir ki, bu barədə "RİA Novosti" məlumat yayıb.
Bildirilib ki, 40 dəqiqə davam edən atəşfəşanlıqdan sonra ABŞ paytaxtının mərkəzi uzun müddət qalın tüstü təbəqəsi altında qalıb.
"Qırmızı hava keyfiyyəti kodu. Açıq havadakı hava yaşlılar, uşaqlar və xroniki xəstəliklərdən əziyyət çəkən insanlar üçün təhlükəlidir", - deyə yerli xidmətlərin rəsmi xəbərdarlığında bildirilib.
Hakimiyyət orqanları sakinlərə açıq havada qalma müddətini minimuma endirməyi tövsiyə ediblər.
Qeyd olunur ki, son günlər Vaşinqtonda rekord yüksək temperatur qeydə alınıb. Bir gün əvvəl termometrlər təxminən 40 dərəcə isti göstərib. Bu göstərici 1898-ci ildən bəri iyulun 4-ü üçün qeydə alınan ən yüksək temperatur hesab olunur.
Şəhərin mərkəzində keçirilən bayram tədbirlərinin təşkilatçıları "tarixin ən möhtəşəm atəşfəşanlıq nümayişi"ni təşkil etmək niyyətində olduqlarını bildirmişdilər.
Atəşfəşanlıq 10 müxtəlif meydançadan həyata keçirilib və ümumilikdə 850 min atəş açılıb.
