Avstraliya Meteorologiya Bürosu (BoM) Sakit okeanın tropik bölgələrində "El-Ninyo" iqlim hadisəsinin başladığını rəsmən bəyan edib.
Oxu.Az xəbər verir ki, bu barədə ABC teleradiokorporasiyası məlumat yayıb.
Bürodan verilən məlumata görə, bu fenomen ölkənin bəzi ərazilərində isti hava şəraiti və quraqlıq təhlükəsini artırır. Sakit okeanın mərkəzi hissəsində suyun səth temperaturu artıq "El-Ninyo" göstəricilərinə çatıb və hadisənin olduqca güclü olacağı proqnozlaşdırılır.
Mütəxəssislər qeyd edirlər ki, "El-Ninyo" adətən Avstraliyanın şərq və cənub-şərq bölgələrində yağıntıların azalması və havanın temperaturunun yüksəlməsi ilə müşayiət olunur. Bu iqlim şəraiti öz növbəsində təbii yanğınlar, quraqlıq və kənd təsərrüfatı məhsuldarlığının aşağı düşməsi riskini xeyli artırır.
ABŞ-nin Milli Okean və Atmosfer Tədqiqatları İdarəsi (NOAA) də "El-Ninyo"nun formalaşdığını təsdiqləyib. Bildirilir ki, bu hadisənin 1950-ci ildən aparılan müşahidələr tarixində ən güclülər sırasına daxil olma ehtimalı 63 faiz təşkil edir. Proqnozlara əsasən, Avstraliyada qarşıdan gələn qış və yaz fəsilləri, xüsusən də qitənin şərq və cənub hissələrində iqlim normasından daha quraq və isti keçəcək.
Xatırladaq ki, "El-Ninyo" Sakit okeanın ekvatorial zolağında səth sularının dövri olaraq isinməsi prosesidir və qlobal miqyasda hava şəraitinə ciddi təsir göstərir. Avstraliyada bu fenomen ənənəvi olaraq quraqlıq, isti hava və meşə yanğınları ilə əlaqələndirilir. Qeyd edək ki, sonuncu belə iqlim hadisəsi 2023-2024-cü illərdə müşahidə olunmuşdu.
