Meksika körfəzinin şərq hissəsində "Berta" tropik fırtınası meydana gəlib.
Oxu.Az xəbər verir ki, bu barədə ABŞ-nin Qasırğalara Nəzarət üzrə Milli Mərkəzi məlumat yayıb.
Məlumata əsasən, "Berta" Florida ştatının Panama-Siti şəhərindən təqribən 180 km məsafədə yerləşir. Fırtına şimal-qərb istiqamətində təxminən 6 km/saat sürətlə irəliləyir və təbiət hadisəsinin episentrində küləyin davamlı maksimal sürəti 65 km/saata çatır.
Meteoroloqların proqnozlarına görə, qarşıdakı iki gün ərzində sahil zonalarında suyun səviyyəsinin kəskin artması ilə müşayiət olunan fırtınanın əsas zərbəsi Florida və Alabamaya dəyə bilər. Bundan əlavə, təbii fəlakətin təsirinə məruz qalan ərazilərə 200 mm-dək yağıntı düşəcəyi və bunun da daşqınlara səbəb ola biləcəyi ehtimal olunur.
