Braziliyada 37 yaşlı qadın özünü 12 yaşlı uşaq kimi təqdim edərək bir ailə tərəfindən övladlığa götürülüb.
Oxu.Az "Daily Mail"ə istinadən xəbər verir ki, bu qeyri-adi fırıldağın üstü bir il keçdikdən sonra, hüquq-mühafizə orqanları tərəfindən saxlanıldıqda açılıb. Hadisə Joinvil şəhərində qeydə alınıb. Özünü "Qabriela" kimi təqdim edən qadın kilsədə ölkənin şimalından, zorakılıqdan qaçdığını iddia edib. Kilsə icması ona sığınacaq tapmaqda kömək edib, daha sonra isə bir ailə onu himayəsinə götürmək qərarına gəlib.
İstintaqın məlumatına əsasən, fırıldaqçı övladlığa götürən ailə ilə 14 ay birgə yaşaya bilib. Cütlük onu həqiqətən öz övladları hesab edib və hətta qızın 12 yaşının tamam olması münasibətilə ad günü mərasimi də təşkil ediblər. Qadın zahirən böyük görünməsini autizm spektri pozuntusu və uşaqlıqda hormon qəbul etməsi ilə əsaslandırıb.
Uydurduğu yalanı inandırıcı etmək üçün o, uşaq butulkalarından istifadə edib. Müstəntiq Rodriqo Bueno Qusso bildirib ki, şübhəli şəxs qəddar atasından qorxduğunu bəhanə edərək, qəyyumlarını onu məktəbə göndərməmələrinə inandıra bilib. Bu saxtakarlıq qohumlardan birinin polisə müraciət etməsi nəticəsində ifşa olunub. Məlum olub ki, həbs edilən şəxs əvvəllər də digər ştatlarda analoji əməllər törətməyə cəhd göstərib. Hətta hadisələrin birində o, uydurduğu "satanist ayinləri" hekayəsini inandırıcı etmək üçün bədəninə 100-dən çox iynə batırıb.
Hazırda həbsdə olan qadına qarşı fırıldaqçılıq və sənədlərin saxtalaşdırılması maddələri üzrə ittihamlar irəli sürülüb.
