Daha iki Afrika ölkəsi - Burkina-Faso və Mali - Donald Trampın bu ölkələrin sakinlərinə viza verməkdən imtina qərarına cavab olaraq, ABŞ vətəndaşlarının girişini qadağan edəcək.
Oxu.Az-ın xəbərinə görə, bu barədə "The Guardian" nəşri yazıb.
Məlumata görə, Mali və Burkina-Faso bəyan ediblər ki, ABŞ Prezidenti Donald Trampın Mali və Burkina-Faso vətəndaşlarının ABŞ-yə girişini qadağan etmək qərarına cavab olaraq, ABŞ vətəndaşlarının öz ölkələrinə girişinə icazə verməyəcəklər.
Nəşr bildirir ki, iki Qərbi Afrika ölkəsinin xarici işlər nazirləri tərəfindən verilən bu bəyanat Qərbi Afrika hərbi hökumətləri ilə ABŞ arasında onsuz da soyuq olan münasibətlərdə son dönüş nöqtəsi olub.
Qeyd edək ki, dekabrın 16-da Tramp ABŞ-yə girişlə bağlı daha əvvəl tətbiq edilən səyahət məhdudiyyətlərini daha 20 ölkəyə şamil edib və bunların arasında Mali, Burkina-Faso və Niger də var. Hərbçilər tərəfindən idarə olunan Mali, Burkina-Faso və Niger isə Qərbi Afrika Dövlətlərinin İqtisadi Birliyindən ayrılan yeni bir regional birlik yaradıblar. Xatırladaq ki, 2024-cü ildə Burkina-Faso, Mali və Niger Sahel Dövlətləri Konfederasiyasını yaradıblar.
Ağ Ev Afrika ölkələri vətəndaşlarına səyahət qadağasının səbəblərindən biri kimi silahlı qruplaşmaların davamlı hücumlarını göstərib.
ABŞ-nin genişləndirilmiş qadağası noyabrın 26-da Vaşinqtonda iki Milli Qvardiya əsgərinin güllələnməsindən sonra Trampın gücləndirilmiş tədbirlərini əks etdirir.
Tramp Administrasiyası immiqrasiya nəzarətinin daha da sərtləşdirilməsini əsaslandırmaq üçün bu hadisəni ön plana çıxarıb.
Bu ayın əvvəlində Mali və Burkina-Fasoya da şamil edilən qadağanı elan edən Vaşinqton rəsmilərinin sözlərinə görə, məhdudiyyətlər xarici vətəndaşların girişinin qarşısını almaq üçün zəruridir, hansı ki, onların yaratdığı risklərin qiymətləndirilməsi üçün ABŞ-nin əlində kifayət qədər məlumat yoxdur.
Mali və Burkina-Faso hər iki ölkədə sürətlə yayılan silahlı qruplaşmaları cilovlamaqda çətinlik çəkirlər.
Eyni zamanda, bir neçə gün əvvəl Niger ABŞ-yə qarşı cavab tədbirləri elan edərək, ABŞ vətəndaşlarına tam şəkildə viza qadağası qoyub. Bu addım ABŞ-nin Niger vətəndaşlarının artıq ABŞ-yə giriş vizaları almaq hüququ olmayan ölkələrin siyahısına əlavə etmək qərarından sonra atılıb. Niger bütün ABŞ vətəndaşlarına vizaların verilməsini tamamilə və birdəfəlik dayandırıb, ABŞ vətəndaşlarının öz ərazisinə girişini qeyri-müəyyən müddətə qadağan edib.
