Evə qayıdış: Fələstinlilər atəşkəs razılaşmasından sonra Qəzzanın şimalına axın edirlər

Minlərlə fələstinli bazar ertəsi Qəzza zolağının şimalına doğru hərəkət edib. İsrail hökuməti atəşkəs razılaşması şərtlərinə uyğun olaraq onlara giriş icazəsi verib.

Oxu.Az-ın verdiyi məlumata görə, bu barədə "Associated Press" xəbər yayıb.

Bildirilir ki, Qəzza zolağının şimalına keçid məntəqəsi İsrail və HƏMAS hərəkatı arasında girovların azad edilməsi proseduru ilə bağlı uzun müzakirələr səbəbindən iki gün gecikmə ilə açılıb.

Qeyd edək ki, israillilər hərbi əməliyyatların aktiv fazasının başlanmasından dərhal sonra Qəzza zolağının şimalındakı mülki şəxslərə ərazini tərk etmək göstərişi vermişdilər. 2023-cü ilin oktyabrında bir milyona yaxın insan cənuba köçmüşdü və bu günə qədər onların geri qayıtmasına icazə verilmirdi.

Razılaşmanın həyata keçirilməsi üç mərhələdən ibarətdir. Birinci mərhələ 42 gün davam edəcək. Bu müddət ərzində atəşkəs rejimi qüvvədə olacaq və İsrail qüvvələri zolağın ən sıx məskunlaşmış ərazilərini tərk edərək anklavın sərhədlərinə çəkiləcək. HƏMAS 33 İsrail girovunu, o cümlədən qadınları və yaşlı vətəndaşları azad edəcək, İsrail isə öz növbəsində 1 890 fələstinli məhbusu azad edəcək.

Birinci mərhələnin şərtləri uğurla yerinə yetirilərsə, tərəflərin növbəti mərhələlər barədə razılığa gələcəyi gözlənilir.