Fransanın ekoloji keçid naziri Monik Barbyu yekun olaraq Prezident Emmanuel Makronun xahişi ilə missiyasını davam etdirməyə razılaşıb.
Oxu.Az xəbər verir ki, bu barədə "Agence France-Presse" məlumat yayıb.
Nazir ölkə başçısının onu dəstəklədiyinə əmin olduqdan sonra istefa qərarından daşınıb.
Xəbərdə bildirilir ki, Fransa lideri xanım nazirin istefasını qəbul etməyib.
Nazirin ölkəyə ciddi zərbə vuran iqlim dəyişikliyinin fəsadlarına qarşı təcili fəaliyyət göstərmək zərurəti, eləcə də ətraf mühitin və əhalinin sağlamlığının qorunması sahəsində qarşıda duran vəzifələrin həlli naminə hökumətdə qalmağa razılıq verdiyi vurğulanır.
Fransa parlamentinin kənd təsərrüfatında əvvəllər qadağan edilmiş pestisidlərin (kənd təsərrüfatı məhsullarına zərər verən həşəratları, alaq otlarını, göbələkləri və gəmiriciləri məhv etmək və ya onlara nəzarət etmək üçün istifadə edilən kimyəvi və ya bioloji maddələrdir - red.) istifadəsinə icazə verən qanun layihəsini qəbul etməsindən sonra ölkənin ekoloji keçid naziri Monik Barbyu istefa verəcəyini açıqlayıb.
Oxu.Az xəbər verir ki, nazir bu barədə özünün sosial şəbəkə hesabında məlumat paylaşıb.
"Son 9 ay ərzində mən meşələrimizin qorunması, su və havanın təmizliyi, torpaq resursları və biomüxtəlifliyin müdafiəsi üçün çalışmışam. Bu gün etiraf etməliyəm ki, buna qarşı çıxan qüvvələr o qədər güclənib ki, mənim bu siyasəti davam etdirmək üçün heç bir vasitəm qalmayıb. Bu səbəbdən baş nazirə hökumətdəki fəaliyyətimi davam etdirmək üçün şərtlərin olmadığını bildirdim və bu gün prezidentə istefa ərizəmi təqdim etmək niyyətindəyəm", - deyə nazir mövqeyini izah edib.
