Fransada supermarketlərdə soyuducuların idarəetmə sistemlərinə edilən kiberhücum araşdırılır. Hücum nəticəsində bəzi soyuducularda temperaturun 50 dərəcəyədək yüksəldiyi bildirilir.
Oxu.Az AFP-yə istinadən xəbər verir ki, hücuma məruz qalan soyuducuların istehsalçısı olan Danimarkanın "Danfoss" şirkəti hadisənin köhnə modellərlə bağlı olduğunu açıqlayıb.
Şirkətin məlumatına görə, sındırılan avadanlıqların əksəriyyətinin zəmanət müddəti başa çatıb və onlar istismar müddətini doldurublar. Həmin cihazlar proqram təminatı və təhlükəsizlik sistemləri üzrə yeniləmələr almayıblar. Bəzi cihazlarda isə köhnəlmiş proqram təminatı olub. "Danfoss" müştərilərini soyuducuların vəziyyətini mütəmadi yoxlamağa və sistemlərini yeniləməyə çağırıb.
Kibertəhlükəsizlik mütəxəssisləri "Reuters"ə bildiriblər ki, "Danfoss" tərəfindən təchiz edilən soyuducu avadanlıqlarının idarəetmə sistemlərinə məsafədən daxil olmaq çətin olmayıb. Ekspertlər proqram təminatında autentifikasiya mərhələsini keçməyə və cihazlarda proqramları işə salmağa imkan verən boşluqlar aşkarlayıblar.
Mütəxəssislərin fikrincə, hücum edənlər geniş məlum olan təhlükəsizlik boşluğundan istifadə edərək, sanki kilidlənməmiş qapıdan içəri daxil olublar. Hücumun hətta sadəcə əylənmək istəyən yeniyetmələr tərəfindən həyata keçirilmiş olması da istisna edilmir.
Soyuducular oktyabrın 12-nə keçən gecə Fransanın müxtəlif bölgələrində hücuma məruz qalıb. Hücum "Carrefour", "Monoprix", "Intermarché", "Netto" və "Coopérative U" şəbəkələrinə daxil olan supermarketlər də daxil olmaqla, 350-dən az mağazaya təsir edib.
"Coopérative U" şirkəti BFMTV-yə bildirib ki, şəbəkəyə məxsus 2 000 supermarketdən yalnız 80-i hücuma məruz qalıb. Həmin mağazalarda temperaturun 80 dərəcəyədək yüksəldiyi qeyd olunub. Şirkətə dəymiş zərər təxminən 200 min avro qiymətləndirilir.
"Intermarché" və "Netto" şəbəkələrinin sahibi olan "Les Mousquetaires" qrupunun prezidenti Tyerri Kotiyyarın fikrincə, hücumun pərakəndə satış sektoruna vurduğu ümumi zərər on milyonlarla avro təşkil edəcək.
Hələlik heç bir haker qrupu hücuma görə məsuliyyəti üzərinə götürməyib. BFMTV-nin hökumət başçısına yaxın mənbələrinə görə, araşdırmaya Fransanın Baş naziri Sebastyan Lekornyu nəzarət edir.
