Tehran ilə Vaşinqton münaqişəsi zamanı İran səmasında vurulan ABŞ-yə məxsus "F-15" qırıcısı haqqında yeni detallar məlum olub.
Oxu.Az xəbər verir ki, bu barədə CNN vəziyyətlə tanış olan dörd mənbənin sözlərinə istinadən eksklüziv məqalə dərc edib.
Qeyd olunur ki, bu ilin aprelində İran hava məkanında təyyarəsi vurulduqdan sonra xüsusi təyinatlılar tərəfindən xilas edilən amerikalı qırıcı pilotu katapult etməzdən əvvəl şokedici mənzərə ilə qarşılaşdığını deyib. O, bildirib ki, bir neçə İran pilotsuz uçuş aparatı havada asılı qalaraq meduzaya bənzər formada, vahid bir mexanizm kimi hərəkət edib. Məlumata görə əvvəllər bu barədə heç bir məlumat verilməsə də, "F-15" pilotu həmin detalları kəşfiyyat işçiləri ilə bölüşüb. Bu xəbər dərhal ABŞ kəşfiyyat cəmiyyətində indiyədək həllini tapmayan ciddi mübahisələrə səbəb olub.
Pilotun söylədikləri, yəni sinxron şəkildə hərəkət edən qrup dronların olması həqiqətə uyğundursa, bu, İranın pilotsuz uçuş aparatları (PUA) texnologiyalarının inkişafında narahatlıq doğuran böyük bir sıçrayış deməkdir.
"Bir-biri ilə əlaqəli şəkildə və tək bir orqanizm kimi hərəkət edən çox sayda dron var idi, daha kiçik ölçülü olanlar isə ayaqlar kimi böyüklərin altında yerləşirdi. Tamamilə yadplanetlilərə aid bir şeyə bənzəyirdi", - deyə pilotun ifadələri ilə tanış olan mənbələrdən biri CNN-ə bildirib.
Digər bir mənbə isə CNN kanalına pilotun səmada gördüklərini dronlardan ibarət mina sahəsi kimi xarakterizə etdiyini deyib.
İki mənbənin sözlərinə görə, "F-15"in dəqiq vurulma səbəbi hələ də araşdırılsa da, ilkin məlumatlarda PUA-ların qruplaşmasının İranın ABŞ təyyarəsini məhv etməsinə hansısa formada şərait yarada biləcəyi vurğulanıb.
"F-15"in heyəti iki nəfərdən - pilot və silah sistemləri operatorundan ibarət idi. Bu qırıcının məhv edilməsi cari münaqişə çərçivəsində ABŞ təyyarəsinin İran üzərində vurulduğu ilk hadisə olub.
Pilot katapult etdikdən bir neçə saat sonra tapılıb, silah sistemləri operatoru isə xilas edilənə qədər bir gündən çox müddət ərzində dağlarda İran qüvvələrindən gizlənməyə məcbur olub. Silah operatorunun da eyni PUA düzülüşünü görüb-görmədiyi hələlik bəlli deyil.
Xilasetmə əməliyyatı gedişatında "A-10" markalı ikinci bir təyyarə də vurulub, lakin onun pilotu İranın hava məkanından kənarda uğurla katapult edərək xilas ola bilib.
ABŞ-nin kəşfiyyat nümayəndələri "F-15" pilotunun danışdıqlarını necə qiymətləndirmək və onun hadisəni dəqiq təsvir edib-edə bilməməsi məsələsində fərqli fikirlərə sahibdirlər.
Qəza nəticəsində pilotda beyin silkələnməsi qeydə alınıb.
