İran rəhbərliyi Fars körfəzi sahilindəki dövlətlərə xəbərdarlıq edərək bildirib ki, Amerika Birləşmiş Ştatları İslam Respublikasına hücum edərsə, onların ərazisində yerləşən enerji infrastrukturlarına cavab zərbələri endiriləcək.
Oxu.Az xəbər verir ki, bu məlumatı Körfəz ölkələrindəki mənbələrə istinadən "Reuters" agentliyi yayıb.
"İranın xəbərdarlığı çox qəti idi: əgər Amerika İranın infrastrukturunu hədəfə alarsa, buna cavab olaraq Körfəz dövlətlərinin enerji obyektlərinə və regiondakı digər hədəflərə zərbələr endiriləcək", - deyə məlumatda qeyd olunub. Agentlik bildirib ki, bu cür həmlələr münaqişənin sülh yolu ilə həlli istiqamətində İran üçün uyğun olan bir razılaşmanın əldə edilməsi məqsədilə müttəfiqləri vasitəsilə ABŞ-yə əlavə təzyiq göstərməyə hesablanıb.
Xatırladaq ki, daha əvvəl ABŞ Prezidenti Donald Tramp Vaşinqtonun Tehranla məsləhətləşmələri davam etdirdiyini və yaxın zamanda razılaşmanın əldə olunacağına ümid etdiyini vurğulayıb.
