Şimali Koreyada Pilotsuz Aviasiya Texnikası Birliyinin elmi-tədqiqat institutlarında və müəssisələrində hazırlanan pilotsuz uçuş aparatlarının sınaqları keçirilib.
Oxu.Az-ın məlumatına görə, bu barədə Koreya Mərkəzi Teleqraf Agentliyi (KTSA) məlumat yayıb.
Sınaqlara KXDR lideri Kim Çen In şəxsən rəhbərlik edib. Dövlət başçısı strateji və taktiki kəşfiyyat PUA-ları və çoxməqsədli dronlar da daxil olmaqla müxtəlif pilotsuz silahların xüsusiyyətləri və döyüş şəraitində tətbiqi ilə tanış olub.
KXDR rəhbəri bildirib ki, müasir müharibədə pilotsuz silahların istifadə sahəsi sürətlə genişlənir və onlar hərbi fəaliyyətin aparıcı vasitəsinə çevrilirlər. O, bu reallığın pilotsuz silah sistemlərinin süni intellekti və onların əməliyyat qabiliyyətinin sürətli inkişafını zəruri etdiyini vurğulayıb:
"Müasir müharibədə pilotsuz silahların istifadə sahəsi daha da genişlənir və onlar hərbi fəaliyyətin aparıcı vasitəsinə çevrilirlər. Bu reallıq bu sahənin əsas texnologiyasının - pilotsuz silah sistemlərinin süni intellektinin və onların əməliyyat aparmaq qabiliyyətinin kəskin inkişaf etdirilməsi zərurətini ön plana çıxarır".
Sınaqların nəticələrinə görə, "Kımson" seriyalı taktiki zərbə dronlarının effektivliyi təsdiq edilib.
