Rusiyada Brejnevin saatı satışa çıxarılıb

Volqoqradda (Rusiya) SSRİ-nin Mərkəzi Komitəsinin baş katibi Leonid Brejnevin 73 illik yubileyi münasibətilə ona hədiyyə edilən qızıl "Raketa" saatı 35 milyon rubla (təxminən 678 min manat) satılır.

Oxu.Az xəbər verir ki, bu barədə v1.ru məlumat yayıb.

"Saat Petrodvorets zavodunda hazırlanıb. Məlumat üçün bildirək ki, bu saat 1983-cü ildə Qalina Leonidovna Brejneva (Leonid İliçin qızı) tərəfindən Mosqorlombardda girov qoyulub və geri alınmayıb", - saat satıcısı bildirib.

O qeyd edib ki, antikvar eksperti saatı 2,5-5,5 milyon dollar dəyərində qiymətləndirib.

Nəşrin məlumatına görə, 2024-cü ilin noyabrında eyni saat 55 milyon rubla satılıb.