Ehtimal olunur ki, İran Yaxın Şərqdə yerləşən ABŞ hərbçilərinin mövqelərini təyin etmək məqsədilə, əsasən ünvanlı reklamlar üçün toplanan geolokasiya məlumatlarından istifadə edir.
Oxu.Az xəbər verir ki, belə bir iddianı "Newsmax" telekanalı irəli sürüb.
Qeyd olunur ki, hədəflənmiş reklam nümayiş etdirən tətbiq və saytlar istifadəçilərin dəqiq GPS koordinatlarını tələb edir. İnsanların məkanı barədə məlumatlar data brokerləri tərəfindən satılır və alınır. "Newsmax " vurğulayır ki, bu cür informasiyanı əldə edə biləcək potensial alıcıların dairəsi faktiki olaraq məhdudiyyətsizdir.
Bir müddət öncə "Reuters" agentliyi bildirib ki, Yaxın Şərqdə xidmət edən bəzi ABŞ hərbi qulluqçularından mobil cihazlarını təhvil vermələri tələb edilə bilər. Narahatlıq doğuran əsas məqam odur ki, bu telefonlarla çəkilən videoların sosial platformalarda paylaşılması, İrana ABŞ-nin bölgədəki obyektlərinə daha dəqiq zərbələr endirmək imkanı yarada bilər.
