Tailand hökuməti Kral Maha Vajiralongkornun (X Rama) böyük qızı, şahzadə Phatçara Kittiyaphinin vəfatı ilə əlaqədar ölkə ərazisində 15 günlük matəm elan edib.
Oxu.Az xəbər verir ki, bu barədə krallığın mətbuat xidməti xəbər yayıb.
"Bütün dövlət qurumları, müəssisələr və təhsil ocaqları 2026-cı il iyunun 12-dən etibarən 15 gün müddətinə dövlət bayraqlarını yarıya qədər endirməlidir. Dövlət qulluqçuları və rəsmi idarələrin əməkdaşları isə bu tarixindən başlayaraq 15 günlük matəm qaydalarına riayət etməlidirlər", - deyə yayılan məlumatda qeyd olunub.
Tailand kralı Maha Vajiralongkornun (X Rama) böyük övladı, şahzadə Phatçara Kittiyapha paytaxt Banqkokda yerləşən Kral Çulalonqkorn Memorial Xəstəxanasında dünyasını dəyişib.
Oxu.Az xəbər verir ki, bu barədə məlumatı kral sarayının dəftərxanası yayıb.
"Tibb personalının mütəmadi və həssas nəzarətinə baxmayaraq, xəstənin vəziyyəti tədricən ağırlaşıb. Nəticədə cümə axşamı yerli vaxtla 19:48-də o, Tailand Qızıl Xaç Cəmiyyətinin Kral Çulalonqkorn Memorial Xəstəxanasında 47 yaşında həyatla vidalaşıb", - deyə açıqlamada qeyd olunub.
Həmçinin vurğulanır ki, şahzadə ürək problemi ilə əlaqədar olaraq 15 dekabr 2022-ci ildən bəri koma vəziyyətində olub və klinikada müalicə alıb.
Xatırladaq ki, Phatçara Kittiyapha 2022-ci ilin dekabrında Naxonratçasima vilayətində təlim keçərkən qəfildən huşunu itirib. Ürək çatışmazlığı diaqnozu ilə hospitalizasiya olunan şahzadə daha sonra Banqkokda yerləşən Kral Çulalonqkorn Memorial Xəstəxanasına köçürülüb.
