Yaponiyada, Tokio yaxınlığındakı zooparkların birində məşhur "Panç" adlı makakanın saxlandığı volyerə daxil olan iki ABŞ vətəndaşı polis tərəfindən saxlanılıb.
Oxu.Az xəbər verir ki, bu barədə "The New York Times" qəzeti məlumat yayıb.
Məlumata görə, 24 yaşlı tələbə qəfəsə daxil olaraq makakaların yanına keçib. Onun yanındakı şəxs isə baş verənləri videoya çəkib.
Təxminən bir dəqiqə sonra zoopark əməkdaşı hadisəyə müdaxilə edərək qayda pozanları ərazidən uzaqlaşdırıb.
Bildirilir ki, "Panç" zooparkın ən çox sevilən heyvanlarından biridir. O, vaxtilə anası tərəfindən tərk edilməsi və bir oyuncağa bağlanması ilə sosial şəbəkələrdə məşhurlaşıb.
Sonradan "Panç" "Momo" adlı başqa bir gənc meymunla yaxınlıq qurub. Zoopark ziyarətçiləri tez-tez onların birlikdə oynadıqlarını və bir-birilərinə qulluq etdiklərini müşahidə edirlər.
