Yunanıstanda işçilərin tətili: Nəqliyyatın hərəkəti dayandırıldı

Yunanıstanda yaşayış xərclərinin artması ilə mübarizə çərçivəsində ölkənin ən böyük həmkarlar ittifaqı maaşların artırılması tələbi ilə tətilə başlayıb.

Bu barədə Oxu.Az İHA-ya istinadən xəbər verir.

Məlumata görə, işçilərin birgünlük tətil qərarından sonra ölkədə nəqliyyatın hərəkəti dayandırılıb. Ölkə ərazisində bərə reysləri ləğv edilib, təyyarə və qatar səfərləri təxirə salınıb. Həmçinin paytaxt Afinada avtobus və metro işçiləri də işin dayandırılması aksiyası keçiriblər.

Yunanıstan Hava Nəqliyyatı İdarəçiləri Birliyindən verilən açıqlamada qeyd edilib ki, 24 saatlıq tətil səbəbi ilə ölkədə hərbi uçuşlarla yanaşı sağlamlıq, axtarış-xilasetmə və humanitar yardım xidmətləri həyata keçiriləcək.

Afina Elefterios Venizelos Beynəlxalq Hava Limanı isə 9 aprel yerli vaxtla saat 23:59-a qədər Yunanıstana hər hansı eniş və uçuşun olmayacağını nəzərə çatdırıb.

Qeyd edək ki, Yunanıstanda həmkarlar ittifaqları artan ərzaq, elektrik enerjisi və mənzil xərcləri səbəbindən əhalinin əksər hissəsinin dolanmaqda çətinlik çəkdiyini iddia edir.