Floridalı ustadan unikal pikap: "Ramgler" sosial mediada maraqla qarşılandı

ABŞ-də "Dodge", "Chrysler" və "Jeep" markalarının diler mərkəzində işləyən floridalı Şon Edvards "Ram 1500" və "Jeep Wrangler" modellərini birləşdirərək unikal pikap yaradıb.

Oxu.Az-ın verdiyi məlumata görə, o, bu qeyri-adi layihənin fotolarını sosial şəbəkədə paylaşıb.

Layihə avtomobil həvəskarları arasında böyük maraq doğurub. Bəziləri, hətta yeni avtomobili zarafatla "Ramgler" adlandırıblar.

Layihəyə əsasən, cari nəsil "Wrangler"dən dəyirmi faralar və radiator barmaqlığı götürülüb. "Qril" quraşdırıldıqdan sonra onunla standart kapot arasında yaranan boşluğu usta LED lentlə örtüb.

Həmçinin "Ramgler" kənar istehsalçıdan yeni güc bamperini əldə edib.

Orijinal pikapın yük platforması qısaldılıb, nəticədə, çıxış bucağı yaxşılaşıb. Yolsuzluq imkanlarının artırılmasına, həmçinin 37 düymlük təkər diskləri, 5 santimetrlik asqı lifti və şnorkel (suda mühərrikin işini təmin edən buraxılış borusu) də xidmət edir.