Hantavirus ağciyər və böyrəklərdə ağır fəsadlar yaratdığı üçün insan sağlamlığına ciddi təhlükə törədir.
Oxu.Az xəbər verir ki, bu barədə hərbi ekspert, mikrobioloq və BMT-nin bioloji silahlar üzrə komissiyasının keçmiş üzvü İqor Nikulin "Gazeta.ru"ya müsahibəsində xəbərdarlıq edib.
Ekspertin sözlərinə görə, söhbət böyük ehtimalla hantavirusun "Andes" ştamından gedir:
"Bu virusun ilkin daşıyıcıları siçanlar, siçovullar və digər gəmiricilərdir. İnfeksiya insana məhz bu heyvanlardan keçir. Virusun iki əsas növü mövcuddur: biri böyrək sindromu yaradır, digəri isə ağciyərlərin şişməsinə səbəb olur. Ağciyər forması daha risklidir və əsasən Amerika qitəsində rast gəlinir".
İqor Nikulin vurğulayıb ki, bu xəstəliyin ev şəraitində müalicəsi yolverilməzdir. İnfeksiyaya yoluxma şübhəsi yaranan kimi dərhal ixtisaslaşmış tibb müəssisələrinə müraciət edilməlidir.
Mikrobioloq virusun laboratoriya şəraitində yaradılma ehtimalını da istisna etməyib. O xatırladıb ki, viroloqlar bir neçə il əvvəl bu patogenin yayılma riski barədə xəbərdarlıq etmişdilər. Hantavirus yüksək yoluxuculuq qabiliyyətinə malik olmasa da, xəstə şəxslə uzunmüddətli və yaxın təmas zamanı insandan insana keçə bilər.
