Çinin "Tyanven-2" (Tianwen-2) adlı kosmik zondu Yerə yaxın yerləşən və "Ayın parçası" ola biləcəyi ehtimal edilən Kamoaleva asteroidini araşdırmaq üçün kosmosda uçuşunu davam etdirir. Aparat artıq kosmosdan çəkdiyi ilk real görüntünü Yerə ötürüb.
Oxu.Az xəbər verir ki, bu barədə Çin Milli Kosmik Agentliyi məlumat yayıb.
Yayımlanan ilk fotoda zondun dairəvi günəş paneli aydın görünür.
Panelin dizaynı ABŞ-nin NASA agentliyinə məxsus "Lucy" kosmik aparatının strukturu ilə oxşarlıq təşkil edir.
Qurumun açıqlamasına əsasən, 28 may tarixində buraxılmış zond artıq 3 milyon kilometr məsafə qət edib.
Qeyd edək ki, indiyədək bu asteroid yalnız vizual təsvirlərlə təqdim olunurdu.
"Tyanven-2"nin əsas missiyası 2026-cı ilin iyulunda Kamoaleva asteroidinə çatmaq və onun səthindən nümunələr toplamaqdır. Bu nümunələrin 2027-ci ilin sonunda Yerə çatdırılması planlaşdırılır.
Qeyd edək ki, Kamoaleva asteroidi Günəş ətrafında Yerlə eyni orbitdə hərəkət edir və bəzi alimlər tərəfindən Ayın qopmuş parçası ola biləcəyi ehtimal edilir.
