Sağlam qidalanma vərdişləri ömrün uzanmasına və bir çox xəstəliklərin riskinin azalmasına kömək edə bilər. Rusiyalı endokrinoloq Maksim Kuznetsov bunun üçün əməl edilməli olan beş əsas qidalanma qaydasını açıqlayıb.
Oxu.Az xəbər verir ki, mütəxəssis bununla bağlı şəxsi "Telegram" kanalında paylaşım edib.
Həkimin sözlərinə görə, ilk növbədə gündəlik duz istehlakı 5 qramdan çox olmamalıdır. Duzun həddindən artıq qəbulu orqanizmdə mayenin ləngiməsinə, arterial təzyiqin yüksəlməsinə və ürəyə əlavə yük düşməsinə səbəb olur.
Kuznetsovun ikinci tövsiyəsi hər gün rasiona ən azı 400 qram meyvə və tərəvəz daxil etməkdir. Onun sözlərinə görə, bu məhsulların tərkibindəki liflər bağırsaq fəaliyyətini yaxşılaşdırır və həzm sisteminin sağlam işləməsinə kömək edir.
Mütəxəssis, həmçinin həftədə iki-üç dəfə balıq yeməyi məsləhət görür. O bildirib ki, balıq ürək və damar sağlamlığı üçün faydalı olan omeqa-3 yağ turşuları ilə zəngindir və ürək-damar xəstəlikləri riskini azalda bilər.
Dördüncü tövsiyə gün ərzində bir-iki fincan qəhvə içməkdir. Həkimin sözlərinə görə, qəhvə orta miqdarda qəbul edildikdə ölüm riskinin azalması ilə əlaqələndirilir və 2-ci tip şəkərli diabetin inkişaf riskini azaltmağa kömək edə bilər.
Endokrinoloqun sonuncu tövsiyəsi isə qida dəyəri aşağı olan, "qida zibili" kimi tanınan ultra emal olunmuş məhsullardan mümkün qədər uzaq durmaqdır.
Kuznetsov vurğulayıb ki, sağlam həyat tərzi sərt qadağalarla deyil, davamlı və faydalı vərdişlərin formalaşdırılması ilə qurulur.
