Kanye Uest arvadının "Qremmi"yə çılpaq qatıldığı üçün qovulmalarına dair ilk dəfə açıqlama verdi

ABŞ-li reper Kanye Uest həyat yoldaşı Byanka Senzorinin "Qremmi" mükafatlandırma mərasiminə çılpaq qatılması ilə bağlı qalmaqal barədə ilk dəfə açıqlama verib.

Oxu.Az-ın xəbərinə görə, bu barədə "X" hesabında paylaşım edib.

Uest Senzori fotoqrafların qarşısına tam şəffaf paltarda çıxdığı üçün mərasimdən qovulmalarına dair şayiələri təkzib edib.

Musiqiçi, həmçinin teleaparıcı Don Lemonun fotosunu dərc edib və bu işdə onu ittiham edib.

"Bu, onillik innovativ musiqi fəaliyyətindən sonra mənim və həyat yoldaşımın "Qremmi"dən qovulduğumuz barədə şayiələrin yayılmasına səbəb olan axmaqdır", - deyə o, fotoya şərh verib.

Qeyd edək ki, daha əvvəl İlon Maskla münaqişədə olan Lemonun həqiqətən də söz-söhbətlərin arxasında olduğuna dair sübut yoxdur.

Kanyeyə yaxın mənbə bildirib ki, "Ən yaxşı rep mahnısı" nominasiyasına namizəd olan Kanye Uest mərasimdə iştirak etmək hüququna malik idi, lakin yalnız şəkil çəkdirib ayrılmağı planlaşdırırdı və "Qremmi"ni də öz istəyi ilə tərk edib.

Xatırladaq ki, Los-Ancelesdə sayca 67-ci dəfə keçirilən "Qremmi" musiqi mükafatına həsr olunmuş tədbirdə qalmaqal baş verib.

Ulduzlar yenicə qırmızı xalıya toplaşmağa başlayan kimi Kanye Uest və onun həyat yoldaşı Byanka Senzori diqqətləri öz üzərilərinə çəkiblər. Kanye Uest tədbirə qara idman köynəyində və şalvarda, Byanka Senzori isə qara uzun kürkdə fotoqrafların qarşısına çıxıb. Qadın daha sonra kürkü üzərindən çıxarıb və tamamilə şəffaf miniatür geyimdə qalıb. Alt paltarsız olan Kanye Uestin həyat yoldaşı soyuqqanlılıqla fotoqrafların qarşısında özünü göstərməyə başlayıb.