"Beynəlxalq Ədalət Məhkəməsində ermənilərin bizə qarşı qaldırdıqları iddialarla bağlı sübutları təqdim etmək üçün prosesə xarici ekspertləri, Mədəniyyət Nazirliyinin və Milli Elmlər Akademiyasının əməkdaşlarını cəlb etmişdik".
Oxu.Az xəbər verir ki, bu fikirləri Xarici İşlər Nazirliyinin Beynəlxalq məhkəmə və arbitraj işləri şöbəsinin müdiri Bədir Bayramov Bakıda keçirilən "Mədəniyyət və hüquq: Müasir çağırışlar forumu" çərçivəsində baş tutan "Mədəniyyət beynəlxalq münasibətlər sistemində" adlı panel müzakirələr zamanı deyib.
O bildirib ki, Azərbaycanın Beynəlxalq Ədalət Məhkəməsi qarşısında Ermənistana qarşı qaldırdığı iddiada bildirilib ki, bu, etnik zəmində baş verib:
"Ermənilər də iddia etdilər ki, Qarabağdakı xristian abidələrə müdaxilə olunub. Biz isə buna qarşı sübutlar təqdim etdik. Belə ki, abidələrin Qafqaz Albaniyasına aid olmasını təsdiq etmək üçün prosesə beynəlxalq ekspertləri, Mədəniyyət Nazirliyinin və Milli Elmlər Akademiyasının əməkdaşlarını cəlb etdik".
O xatırladıb ki, bu kimi təcrübələr əvvəllər də olub:
"2008-ci ildə Gürcüstan Rusiyaya qarşı iş qaldırmışdı. Düzdür, sonradan proses tamamlanmadı. Həmçinin 2017-ci ildə Ukrayna Rusiyaya qarşı məhkəmə iddiası qaldırmışdı ki, məhkəmə yalnız Ukrayna dili ilə bağlı iddianı təmin etdi, digərləri ilə bağlı isə yetərli sübutun olmadığını bildirdi".
Aqil Vəlili
