"Qeyri-hökumət təşkilatlarının, xüsusən də Qoşulmama Hərəkatına sədrlik edən Azərbaycan tərəfinin mövqelərin konsolidasiyası təşəbbüsü yüksək qiymətə layiqdir, ümumi rifah və dayanıqlı inkişaf yolunda zəruri addımdır".
Oxu.Az "Report"a istinadən xəbər verir ki, bunu Kuala-Lumpur (Malayziya) meri Maimuna Mohd Şərif Qlobal Cənub QHT Platformasının təsis konfransının iştirakçılarına ünvanlandığı videomüraciətində bildirib.
Onun sözlərinə görə, Azərbaycan qlobal arenada, o cümlədən Qoşulmama Hərəkatı və BMT-nin İqlim Dəyişmələri üzrə Çərçivə Konvensiyasının Tərəfləri Konfransının 29-cu sessiyası (COP29) çərçivəsində dəfələrlə liderliyini nümayiş etdirib.
"Qlobal Cənubda 90-dan çox ölkədən olan iştirakçıların iştirakı vətəndaş cəmiyyətinin birlikdə işləməyə, gələcəyi planlaşdırmağa və formalaşdırmağa dərin sadiqliyini nümayiş etdirir. Mən Azərbaycana Bakıda bu heyrətamiz platformaya ev sahibliyi etdiyinə və dünya miqyasında liderliyinə görə təşəkkür edirəm.
Qoşulmama Hərəkatının sədri kimi 2019-23-cü illərdə Azərbaycan çoxtərəfli və inklüziv dialoqun təşviqində mühüm rol oynayıb. Bu isə müasir geosiyasi qeyri-sabitlik şəraitində xüsusilə qiymətlidir", - o qeyd edib.
