Sarıcalıya qayıdan sakin: "Ağdam mənim üçün çox həssas mövzudur"

"22 yaşımda çıxmışdım, bir oğlum, bir körpə qızım var idi, indi isə nəvələrimlə qayıdıram öz yurduma".

Bunu Oxu.Az-a açıqlamasında bu gün Ağdam rayonunun Sarıcalı kəndinə köç edən keçmiş məcburi köçkün Solmaz Əliyeva deyib.

O qeyd edib ki, Ağdam onun üçün ən həssas mövzudur:

"Gənc idim Ağdamdan çıxanda. İki uşaqla çox çətinlik çəkdim. Ağdam mənim üçün çox həssas mövzudur. Məcburi köçkün düşdüyümüz o günlər indi də qorxulu yuxu kimi gəlir mənə. Çox şükür ki, torpaqlarımız azad edildi, indi nəvələrimlə öz yurduma qayıdıram.

Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!"

Xatırladaq ki, bu gün növbəti köç karvanı Ağdam rayonunun Sarıcalı kəndinə yola salınır. Bu mərhələdə daha 34 ailə (141 nəfər) öz doğma yurduna köçürülür.

Qeyd edək ki, hazırda Qarabağda və Şərqi Zəngəzurda, oraya köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 minə yaxın insan yaşayır.

Sarıcalıya qayıdan sakin: "Ağdam mənim üçün çox həssas mövzudur"

Rövşən Əsədov