ABŞ tərəfindən Ukraynaya "Tomahawk" qanadlı raketlərinin veriləcəyi ilə bağlı xəbərlərin ilkin həyəcanı aradan qalxan kimi bu raketlərin Rusiya ilə müharibədə dönüş yaratmağa qadir olub-olmaması ilə bağlı məsələ ön plana çıxıb.
Əksər ekspertlər burada həlledici amilin veriləcək raketlərin sayı və Birləşmiş Ştatların təqdim edəcəyi kəşfiyyat məlumatları ilə bağlı olacağını bildirirlər. Yəni sayı 1 000-dən az olan və yalnız istehsalçı ölkənin verə biləcəyi kəşfiyyat məlumatları olmadan "Tomahawk"ların, necə deyərlər, "havanı çox da dəyişməyəcəyi" iddia edildi.
Raketlərin Ukraynaya verilib-verilməyəcəyi hələlik tam aydınlaşmasa da, son həftə ərzində onlarla bağlı daha bir məqam ciddi müzakirə mövzusuna çevrilib. Məsələ bu qanadlı raketlərin zərbə məsafəsindəki qarışıqlıqla bağlıdır. Belə ki, bəzi mənbələr ilkin uçuş göstəricisi 2 500 km olan "Tomahawk"un Rusiyanın yalnız 1 300 km dərinliyindəki hədəflərə zərbə endirə biləcəyini, digər mənbələr isə bu dərinliyin 1 600 və 1 700 km olduğunu vurğulayırlar.
Təbii ki, uçuş məsafəsi parametri raketlərin Ukraynadan Rusiya ərazisində vura biləcəyi hədəflərin sayını müəyyən edir və onun 2 500 və ya 1 300 km olması çox şeyi dəyişir. Çünki birinci göstərici ilə Rusiyanın demək olar ki, Ural dağları həddinədək yerləşdirilmiş strateji hədəflərinə zərbə endirmək imkanı yarandığı halda, ikinci göstərici yalnız onun Avropa hissəsində yerləşən hədəfləri təhlükə altına sala bilir. Bəs real durum nədir və dünyanın ən məşhur silahlarından biri ilə bağlı yaranmış bu qarışıqlıq nə ilə bağlıdır? Bu və digər suallara "Hərbi xronika" rubrikasının yeni buraxılışında aydınlıq gətirilib.
Mövzu ilə bağlı daha ətraflı videomaterialı təqdim edirik:
