ABŞ-də əcnəbilər üçün yeni qaydalar: Sosial şəbəkələrdə antisemitizm viza rəddinin səbəbi ola bilər

ABŞ hökuməti xarici tələbələrin və "green-card" istəyənlərin sosial şəbəkələrini yəhudilərə qarşı düşmənçilik münasibətinin təzahürü baxımından yoxlayacaq.

Oxu.Az-ın TASS-a istinadən məlumatına görə, bu barədə ölkənin Vətəndaşlıq və Miqrasiya Xidməti (USCIS) məlumat verib.

Bildirilib ki, əcnəbilərin sosial şəbəkələrdəki antisemit fəaliyyəti və yəhudiləri fiziki təqibi miqrasiya güzəştlərinin verilməsi sorğularının rədd edilməsi üçün əsas kimi nəzərdən keçiriləcək.

"Bu, daimi rezident statusu almaq üçün ərizə verən əcnəbilərə, əcnəbi tələbələrə və təhsil müəssisələrinə daxil olan digər vətəndaşlara təsir edəcək", - deyə məlumatda bildirilir.

ABŞ Daxili Təhlükəsizlik Nazirliyi öz növbəsində ölkəni antisemit terror fəaliyyətlərini, aqressiv antisemit ideologiyalarını və antisemit terror təşkilatlarını dəstəkləyənlər də daxil olmaqla, əcnəbi ekstremistlərdən və terrorçulardan qorumaq üçün bütün miqrasiya qanunlarına riayət olunmasını təmin edəcəyini vurğulayıb.

Qeyd edək ki, ABŞ Təhsil Nazirliyi martın ortalarından yəhudi mənşəli tələbələri etiraz aksiyalarından qorumayacaqları təqdirdə baş verə biləcək nəticələr barədə 60 Universitetə xəbərdarlıq edib. Bildirişləri alanlar arasında Braun, Harvard, Yel, Kolumbiya, Kornel və Prinston universitetləri də var.